ХИЗМАТ СИФАТИНИ ЯХШИЛАШ УЧУН НАЗОРАТ ТАДБИРЛАРИ ОЛИБ БОРИЛМОҚДА

Жамоат транспорти ўзининг ютуқ ва камчиликлари билан доим эътиборда. Бироқ ҳозирги кунда унинг ижобий томонларидан кўра, салбий жиҳатлари кўпроқ кўзга ташланмоқда. Бу эса ўз навбатида йўловчиларнинг эътирозларига, ижтимоий тармоқларда кўплаб муҳокамаларга сабабчи бўлиб қолмоқда.

Ҳақиқатан ҳам шаҳар йўловчи ташиш йўналишларида ҳаракатланувчи автобуслар ва йўналишсиз таксиларда аҳолига кўрсатилаётган хизматни сифатли деб бўлмайди. Агар холисона фикр юритадиган бўлсак, автобусларнинг ташқи ва ички жиҳатдан тозалиги, ҳайдовчиларнинг белгиланган талаблар асосида ҳаракатланиши, валидаторлар билан боғлиқ муаммолар учраб турибди. Бироқ, бу билан жамоат транспорти ўз ҳолига ташлаб қўйилган, деган фикрдан йироқмиз. Самарқанд вилояти транспорт бошқармаси ходимлари томонидан автобус ва йўналишсиз таксиларнинг белгиланган талаблар асосида фаолият юритиши юзасидан доимий назорат ишлари олиб борилмоқда.

Вилоят ИИБ ЙҲХБ ходимлари билан ҳамкорликда олиб борилаётган назорат тадбирлари давомида аниқланган камчиликлар юзасидан тегишли тартибда ҳужжатлар расмийлаштирилиб, ташувчи корхоналар раҳбарлари жиддий огоҳлантирилмоқда. Ҳайдовчиларнинг кийиниш ва муомала маданияти, автобусларнинг санитария-гигиена талабларига мос келиши, қайтим бериш, “Tezcard” электрон тўлов карталари учун валидаторларнинг мавжудлиги ва ишчи ҳолатда эканлигига алоҳида эътибор қаратилаётганлигини ҳам айтиб ўтиш жоиз.

Автобуслардаги мавжуд камчиликларни бартараф қилиш билан биргаликда ноқонуний йўловчи ташиш ҳамда йўналишсиз таксилар фаолиятига ҳам жиддий эътибор қаратилган. Бунда автотранспорт воситасининг техник томонлари билан бир қаторда санитар қоидаларига бўлган эътибор ҳам кўздан кечирилмоқда. Шу билан биргаликда йўналишсиз таксиларнинг Ўзбекистон Республикаси Вазирлар Маҳкамасининг “Йўналишсиз таксилар фаолиятини тартибга солиш чора-тадбирлари тўғрисида” қарорида белгиланган тартибда жиҳозланиши ҳам ўрганилмоқда.