ЖАМОАТ ТРАНСПОРТИДАН ФОЙДАЛАНГАНДА НИҚОБ ТАҚИНГ!

Ташувларда сифат даражасини кўтариш, автотранспорт воситаларини тўлиқ техник кўрикдан, ҳайдовчиларни малакали тиббий ходимлар кўригидан ўтказиш, тана ҳарорати пирометрларда ўлчаниб, 37 даражадан баланд кўрсатгичга эга бўлган ҳайдовчиларни йўналишга чиқармаслик, йўловчилар билан мулоқотга киришишда муомала маданиятини ошириш давр талабидир. Йўловчи ташиш фаолиятини тубдан такомиллаштириш ҳамда ташувларда белгиланган санитар қоидаларга амал қилиш бугунги куннинг долзарб масалалардан бири.

Шунинг учун биринчи навбатда белгиланган тартибда автобусларнинг ташқи ва ички томонларида тозаликка эътибор қаратиш ҳамда дезинфекция-зарарсизлантириш ишларини мунтазам олиб бориш ҳар бир ташувчи корхона раҳбарларининг зиммасидаги вазифасидир. Зеро, йўловчиларга хизмат кўрсатишда сифат даражаси муҳим омиллардан ҳисобланади. Жамоат транспорти ўз номидан келиб чиқиб жамоатга, яъни аҳолига хизмат кўрсатади. Шунинг учун автобусларда, йўналишли ва йўналишсиз таксиларда дезинфекция ишларини олиб бориш шарт ва зарур.

Ушбу жиҳатларни ҳисобга олган ҳолда ҳозирги кунда автосаройларда, сўнги бекатларда автобуслар дезинфекция қилинаётган бўлса, Самарқанд вилоят транспорт бошқармаси “Автомобилларда ташувлар хавфсизлигини таъминлаш юзасидан назорат қилиш бўлими” инспекторлари автобуслар салонида йўловчиларнинг сони, ижтиомий масофа ҳамда тиббий ниқобда бўлишини назорат қилишмоқда. Тиббий ниқобсиз ҳайдовчилар ҳамда йўловчиларга карантин қоидаларига риоя қилиш орқали ўзининг ва оила-аъзоларининг соғилиги ҳақида қайғуриши лозимлиги тушунтирилмоқда.

Самарқанд темирйўл вокзали ҳамда Самарқанд аэропортида ҳам карантин қоидаларидан келиб чиқиб қўйилган талаблар ижроси таъминланган. Аэропотга ёки темирйўл вокзалига киришда йўловчилардан ижтимоий масофа сақлаш талаб қилинмоқда.  Темирйўл ёки авиаташувчилар хизматидан фойдаланаётган ҳар бир йўловчининг тана ҳарорати пирометрларда ўлчангач, антисептик воситалардан фойдаланиш тавсия қилинаётир. Бундан кўзланган мақсад, инфекция тарқалишининг олдини олиш ҳамда йўловчилар саломатлигини сақлашдан иборатдир.

Шу ўринда барча йўловчилардан карантин қоидаларига тўлиқ риоя қилишларини, ўз саломатликларига жиддий эътибор қаратишларини сўраб қолган бўлардик. Шу билан биргаликда йўловчи ташувчи транспорт  воситаларидан фойдаланган ҳар бир йўловчига антисептикдан фойдаланишни тавсия қиламиз.