Haydovchiga nisbatan intizomiy jazo chorasi qo`llanildi

#Munosabat

Joriy yilning 9-noyabr sanasida ijtimoiy tarmoqlarda 52-sonli “Sartepa maskani-Zarafshon mahallasi” shahar avtobus yo‘nalishida yo‘lovchilarga xizmat ko‘rsatuvchi, davlat raqami belgisi 30 869 LBA bo‘lgan transport vositasi haydovchisining xatti-harakatlari yuzasidan murojaat e’lon qilindi.

Murojaatda aytib o‘tilgan holat - avtobus haydovchisining bekatda uzoq vaqt sababsiz to‘xtab qolishi, yo‘lovchilarning vaqtini behuda sarflagani, ularga nisbatan qo‘pol munosabatda bo‘lganligi yuzasidan tashuvchi korxona rahbar va xodimlari o‘rtasida muhokama qilindi.

Unda yo‘l harakati qoidalariga qat’iy amal qilish, yo‘lovchilar bilan samimiy munosabatda bo‘lish, bekatlarda belgilangan vaqtdan ortiqcha to‘xtab qolmaslik har bir haydovchiga tushuntirildi. Jamoat transporti haydovchisiga qo‘yilgan talablarga so‘zsiz rioya qilish yuzasidan barcha birdek qat’iy ogohlantirildi.

“Marokand Trans 777” MCHJ tasarrufida bo‘lgan, 52-sonli “Sartepa maskani-Zarafshon mahallasi” shahar avtobus yo‘nalishida yo‘lovchilarga xizmat ko‘rsatuvchi, davlat raqami belgisi 30 869 LBA bo‘lgan transport vositasi haydovchisi G.F.ga qonunchilikda belgilangan tartibda rasman “hayfsan” intizomiy jazosi qo‘llanildi.