Самарқанд вилояти Қурилиш бошқармаси мажлислар залида “Самарқанд вилоятида аҳолига транспорт хизматлари кўрсатилиши ҳолатининг натижадорлиги” масалаларига бағишланган кенгайтирилган йиғилиш бўлиб ўтди.

Йиғилишда вилоят ҳокими котибияти мудири Э.Вафаходжаев, вилоят ҳокимининг ҳарбий масалалар бўйича маслаҳатчиси А.Раимжанов, Самарқанд вилоят транспорт бошқармаси бошлиғи И.Ҳамраев ҳамда аҳолига йўналишли ва йўналишсиз транспорт хизмати кўрсатиб келаётган тадбиркорлик корхоналари раҳбарлари ҳамда туман, шаҳар ҳокимларининг қурилиш масалалари бўйича ўринбосарлари қатнашди.

Мажлисда аҳолини энг кўп қийнаётган муаммолардан транспорт воситаларининг санитар ҳолатини қониқарсизлиги, транспорт воситаларининг техник ҳолати носозлиги, ҳайдовчиларнинг кийиниш, муомала маданияти, йўл кира ҳақи берилганда, қайтимлар берилмаслиги, қонун талабларида йўналишсиз (сариқ) таксиларда йўлкира ҳақи таксометр ҳисоблагич орқали тўланиши белгиланган бўлсада, ушбу тартибга бирорта корхонага тегишли транспорт воситалари амал қилмаслиги, кондуктор сифатида вояга етмаган мактаб ўқувчиларининг жалб этилиши, оралиқ бекатларнинг етишмаслиги, бу ҳолат, айниқса ёз ва қиш фаслларида фуқароларга қийинчиликлар туғдираётганлиги, йўловчиларнинг бекатларда узоқ вақт кутиб қолишлари, яъни автобусларнинг қатнов графигига амал қилмаслиги, айрим ҳолатларда автобусларнинг кечки вақт 18:00дан кейин қатновларини тўхтатиши, бу борада Самарқанд шаҳрининг чекка ҳудудларида яшовчи фуқароларга ноқулайликларнинг юзага келтираётганлиги, автобусларнинг бекатларда узоқ вақт тўхтаб қолишлари, транспорт воситалари томонидан йўловчиларнинг соғлиғи ва ҳаётига хавф солган ҳолда ҳаракатланишлари, туманларда узоқ ҳудудларга транспорт қатновининг тўлиқ йўлга қўйилмаганлиги, автобус ва таксилар томонидан кўчаларда тирбандликлар юзага келтирилаётганлиги танқидий таҳлил қилинди. Ишчи гуруҳ томонидан ўрганилган маълумотлар видеолавҳалар орқали намойиш этилди.

“АРХИДЕЯ МОТОРС” МЧЖга қарашли “ISIZU” русумли давлат рақами 30 092 ЕВA, 30 032 YAA, 01 894 FFA автобуслар, “АЗИЗ АВТОЙЎЛОВЧИ ТРАНС” МЧЖга қарашли “ISIZU” русумли давлат рақами 30 731 WAA, 30 173 ХAA ва 30 827 WAA  бўлган транспорт воситаларининг техник-санитар талабларга жавоб бермаслиги, салони тўлиқ парда билан қайта жиҳозланганлиги, олд ойнаси синган, олд буфери йўқ, ўриндиқлари тўлиқ эмас, синган, қопламалари йиртилган ҳолатда, йўловчи ташиш ҳуқуқини берувчи тендер ғолиби гувоҳномасисиз, йўналиш схемасисиз ҳаракатланган.

 Шу билан биргаликда 101-сонли ҳамда 31-рақамли йўналишда ҳаракатланаётган 30 176 ХАА давлат рақамли автобуснинг суюлтирилган газга мослаштирилган балонларидан газ сизиб чиқаётганлигига қарамасдан йўловчиларга хизмат кўрсатиб келаётганлиги аниқланган. Юқоридаги ҳолатлар қайта такрорланмаслиги учун санаб ўтилган транспорт воситаларига берилган лицензиялар 10 кун муддатга тўхтатилди ҳамда транспорт корхонасининг фаолиятини қайта кўриб чиқиш вазифаси топширилди. Бундан ташқари, “ЗАРАФШОН ПРЕСТИЖ”, “АРСЛАН МОТОРС ТРАНС”, “БАХТ МАРОҚАНД ТРАНС”, “САМАРҚАНД ТРАНС СЕРВИС ПЛЮС”, “ЯХЪЁБЕК УНИВЕРСАЛ ТРАНС ПЛЮС”, “ЗАМИН САЙҚАЛ НУР ТРАНС”, “САМАРҚАНД КАТТАҚЎРҒОН ЙЎЛОВЧИТРАНС” МЧЖларга қарашли транспорт воситалари таксометрсиз, ҳайдовчилар белгиланган норма талабларини бузганлиги, транспорт воситасининг техник ҳолати санитария талабларига жавоб бермасдан йўловчиларга транспорт хизматларини кўрсатиб келаётганликлари учун одам ташиш ҳуқуқини берувчи лицензияси 10 (ўн) кун муддатга тўхтатилди. Берилган муддат ичида қўйилган талаблар бажарилмаса, одам ташиш ҳуқуқини берувчи лицензия умуман бекор қилиниши борасида огоҳлантирилди. Шунингдек, “ЭЛЕГАНТ ТАКСИ СЕРВИС” МЧЖ, “ДИЛЧИРОҚ СЕРВИС”, “СИТОРАБОНУ УНИВЕРСАЛ ИНВЕСТ” “РАДЖАБАЛИ ТРАНС СЕРВИС” МЧЖ ларга қарашли транспорт воситаларида юқоридаги ҳолатлар такрорланганлиги инобатга олиниб уларга ҳам 10 (ўн) кун муддатга лицензиясини тўхтатиб туриш таклиф қилинди.

Шунингдек йиғилишда Самарқанднинг туристик салоҳияти ортиб бораётган бир вақтда бундай кўнгилсизликларга ўрин қолдирмаслик лозимлиги таъкидланди. Энг ачинарлиси, автобуслардаги белгиланган 1400 сўм ўрнига 1500 сўмдан олинаётганлиги қаттиқ танқид остига олинди ва бунга чек қўйиш вақти келганлиги қайта-қайта такрорланди. Бу ўз навбатида аҳоли ўртасида норозиликларга сабаб бўлаётганлиги айтилди. Бундан ташқари, ноқонуний - лицензиясиз фаолият олиб бораётган киракашларга қарши кескин курашиш даври келганлиги ва бу борада олиб борилаётган ишларни давом эттириш лозимлиги таъкидланди. Ўз навбатида тадбиркорларни қийнаб келаётган муаммолар ҳам тингланди ва масалага ечим топиш вазифаси соҳага тегишли мутасаддиларга топширилди.

Тадбиркорлардан тушган таклифлар инобатга олинди.

Самарқанд вилоят транспорт бошқармаси ахборот хизмати

и