Damas rusumli transport vositalarini mikroavtobuslarga almashtirish tavsiya etildi

Samarqand viloyati transport boshqarmasi majlislar zalida viloyatda yo‘nalishli taksi xizmatini ko‘rsatuvchi avtokorxonalar rahbarlari ishtirokida kengaytirilgan tarzda tanqidiy yig‘ilish bo‘lib o‘tdi. Unda boshqarma boshlig‘i R.Tojiyev hamda Transport nazorati inspeksiyasi viloyat hududiy bo‘limi boshlig‘i E.Murodov so‘zga chiqib, yo‘nalishli taksi yo‘nalishlarida xizmat ko‘rsatayotgan Damas rusumli transport vositalarida yo‘lovchi tashish sohasiga qo‘yilgan talablar buzilayotganligini tanqidiy tahlil qildi. Bunda belgilangan yo‘nalishdan chiqish holatlari, avtotransport vositalarini talablar asosida jihozlashga rioya qilinmayotganligi, shuningdek, yo‘lkira narxlarining sun’iy ravishda oshirilayotganligi asoslovchi dalillar orqali tanqid ostiga olindi.

Birgina 2024-yilning 22-iyul kuniga qadar litsenziya hamda tender ta shartlariga rioya qilinmaganligi uchun tegishli organlar ruxsati bilan 12 ta korxonada tekshiruv ishlari olib borildi. Yo‘l qo‘ygan kamchiliklari uchun ularga BHMning 100 baravaridan 400 baravarigacha bo‘lgan miqdorda jarima belgilandi. Bu korxona rahbarlarining o‘z ishiga loqaydligidan dalolat beradi, dedi o‘z so‘zida R.Tojiyev.

Yig‘ilish davomida tenderlarda ishtirok etmaslik, yo‘nalish chizmasini o‘zboshimchalik bilan o‘zgartirish kabi holatlarga barham berish maqsadida korxonalar reytingini yuritish va kelib chiqayotgan muammolarning oldini olish bo‘yicha bo‘lim va shu’ba boshliqlariga vazifalar yuklatildi.

Shuningdek, barcha avtokorxonalar rahbarlariga yo‘nalishli taksi yo‘nalishlarida xizmat ko‘rsatayotgan “Damas” rusumli avtomobillarni bosqichma-bosqich M2 toifali transport vositalariga (mikroavtobuslar va og‘irligi 3,5 tonnagacha bo‘lgan kam sig‘imli avtobuslar) almashtirish yuzasidan tavsiya berildi.