Haydovchi va "konduktor" bilan tushuntirish ishlari olib borildi

#Munosabat

Ijtimoiy tarmoqlarda avtobus salonida dahanaki janjal bo‘lgan holat yuzasidan videolavha tarqalmoqda. Mazkur holat viloyat transport boshqarmasi tomonidan o‘rganib chiqildi.

Aholining e’tirozlariga sabab bo‘lgan holat 2024-yil 14-dekabr sanasida 66-sonli “Badal mahallasi-SamDAQU” shahar avtobus yo‘nalishida harakatlanuvchi, davlat raqami belgisi 30/831 LBA bo‘lgan avtobusda sodir bo‘lgan.

Haydovchi bilan bo‘lib o‘tgan suhbatda Samarqand shahri, Mirzo Ulug‘bek ko‘chasida joylashgan “Aloqabank” bekatida uning tomonidan (korxona rahbariyatini ogohlantirmasdan) yollangan yordamchi (konduktor) hamda yo‘lovchi o‘rtasida o‘zaro gap talashish holati sodir bo‘lgan.

Holat qayta takrorlanmasligi uchun haydovchi bilan tegishli tartibda tushuntirish ishlari olib borildi. Unda yo‘lovchilar bilan samimiy munosabatda bo‘lish, bekatlarda uzoq to‘xtab qolmaslik, noqonuniy ravishda “yordamchi” yollamaslik masalalariga urg‘u berildi.

Shuningdek, “konduktor” sifatida ish olib borgan X. ismli fuqaro bilan ham tegishli tartibda suhbat oli borildi. Unda konduktor bo‘lib ishlash uchun korxonaga rasmiy ravishda xodim bo‘lib ishga kirish, faoliyati davomida yo‘lovchilar bilan samimiy munosabat o‘rnatgan holda ish olib borishi, aks holda qonunda belgilangan tartibda jazo choralari qo‘llanilishi yuzasidan ogohlantirish berildi.