Jamoat transporti: Muammo va yechim

#Munosabat

Jamoat transporti bilan bog‘liq muammolarni o‘rganish maqsadida Zarnews.uz sayti ijodkorlari tomonidan aholi o‘rtasida ijtimoiy so‘rovnoma o‘tkazildi.

So‘rovnomada ishtirok etganlarning 25 foizi jamoat transportida xizmat ancha yaxshilanganini e’tirof etgan, demak sohada olib borilayotgan islohotlar o‘z samarasini bermoqda.

Endi muammoli holatlarga to‘xtalib o‘tsak. Haqiqatan ham, bugungi kunda viloyat miqyosida 69 ta avtobus yo‘nalishi avtotransport vositasi yetishmasligi natijasida to‘xtab qolgan. Ushbu yo‘nalishlarni qayta tiklash uchun 367 ta avtobus talab qilinadi. Shuningdek, 28 ta yo‘nalishli taksi yo‘nalishlari mikroavtobuslar yetishmasligi natijasida to‘xtab turibdi. Ushbu yo‘nalishlarga 320 ta transport vositalari joylashtirilishi belgilangan. 

Samarqand shahrida aholini jamoat transporti bilan ta’minlash hamda transport infratuzilmasini yaxshilash maqsadida ishlab chiqilgan Bosh rejaga asosan 503 ta zamonaviy talablar asosida jihozlangan avtobus kerak. Bugungi kunda tadbirkor subyektlari tomonidan rejadagi avtobuslarning 124 tasi olib kelinib, shahar avtobus yo‘nalishlarida xizmat ko‘rsatmoqda. Albatta, bu juda kam ko‘rsatkich. Bu borada amalga oshirilishi lozim bo‘lgan ishlar talaygina. Viloyat transport boshqarmasi tomonidan mazkur yo‘nalishlarni qayta tiklash uchun barcha imkoniyatlar ishga solingan.

Xuddi shu o‘rinda aholining transportga bo‘lgan ehtiyojini qondirish borasida olib borilayotgan ishlarga to‘xtalib o‘tsak. Hududlarni jamoat transporti bilan qamrab olish maqsadida yil yakuniga qadar 304 ta avtobus olib kelinishi rejalashtirilgan. Shundan 94 ta elektrobus YeTTB banki hamkorligida, 160 tasi (90 avtobus, 70 elektrobus) “Marokand Trans 777” MCHJ, 40 tasi “Samarqand Hamkor Trans” MCHJ hamda 10 tasi “Sevinch Trans Servis” MCHJ tomonidan olib kelinishi uchun dastlabki hujjatlar rasmiylashtirildi. Shuningdek, Transport boshqarmasi ko‘magida 100 ga yaqin mikroavtobuslar olib kelish borasida tadbirkorlik subyektlari tomonidan hujjatlar rasmiylashtirilmoqda. Bir so‘z bilan aytganda, aholini jamoat transporti bilan ta’minlash borasida ishlab chiqilgan rejalarni amalga oshirish uchun bor imkoniyatlar ishga solingan.

O‘z o‘rnida jamoat transportiga befarq bo‘lmagan tahririyat xodimlariga, ushbu so‘rovnomada qatnashgan hamda o‘z fikr va takliflarni bildirgan barchaga minnatdorlik bildiramiz. Aholining jamoat transportiga bo‘lgan ehtiyojini qondirish viloyat transport boshqarmasining oldiga qo‘yilgan asosiy vazifasi ekanligini aytib o‘tmoqchimiz.