Jamoat transporti qatnovini qayta tiklash maqsadida tadbirkorlik subyektlariga takliflar berilgan

#Munosabat

Joriy yilning 21-yanvar sanasida ijtimoiy tarmoqlardagi “Samarqand_LIVE” kanalida jamoat transportini yo‘lga qo‘yish borasida murojaat e’lon qilindi.

Murojaatchi nazarda tutgan 55^B-sonli “Siyob bozori-Davlatobod mahallasi” avtobus yo‘nalishida “Navobod trans” MCHJga tegishli transport vositalari aholiga 2023-yilga qadar xizmat ko‘rsatib kelgan. Biroq, mazkur yo‘nalishdagi avtomobil yo‘lida haddan ziyod sun’iy notekisliklar o‘rnatilganligi sababli avtobuslar ta’mirtalab va yaroqsiz holatga kelib qolgan. Buning natijasida tashuvchi-tadbirkor tomonidan harakat to‘xtatilgan.

Yo‘nalish 2023-2024-yillar davomida 3 marta Samarqand viloyati transport boshqarmasi tomonidan ochiq elektron tenderga chiqarilgan. Yo‘nalishda xizmat ko‘rsatuvchi talabgor bo‘lmaganligi sababli vaqtincha to‘xtab qolgan.

2024-yil dekabr oyida “Navobod trans”MCHJ tomonidan zamonaviy talablar asosida jihozlangan yangi avtobuslar olib kelindi. Tashuvchi-tadbirkor bilan o‘tkazilgan muhokamadan so‘ng yangi avtobuslar mazkur yo‘nalishda sinov tariqasida aholi xizmatiga chiqarildi. Biroq, avtomobil yo‘lida o‘zgarish bo‘lmaganligi hamda yangi avtobuslarning texnik shikastlanish ehtimoli yuqoriligi sababli tadbirkorlik subyekti tomonidan harakat to‘xtatildi.

Bugungi kunda Samarqand viloyati transport boshqarmasi tomonidan mazkur yo‘nalishda jamoat transporti qatnovini qayta tiklash maqsadida tadbirkorlik subyektlariga takliflar berilgan. Yo‘nalishda avtobuslar harakatini qayta tiklash uchun barcha imkoniyatlar ishga solingan.

Shu o‘rinda barchadan har xil “shapka”lar haqidagi mish-mish tarqatuvchilarning bo‘htoniga uchmasliklarini, uni tarqatuvchilarga esa aholi o‘rtasida noto‘g‘ri tushuncha shakllantirmasligini, asosli dalillar bo‘lsa, huquqni himoya qilish organlariga taqdim etishlarini so‘rab qolamiz.