Jamoat transportida xizmat sifati oshiriladi

Samarqand shahar jamoat transporti xizmat sifatini takomillashtirish, mavjud imkoniyatlardan to‘g‘ri foydalangan holda aholiga qo‘shimcha qulayliklar yaratish, shu bilan birgalikda tadbirkorlik subyektlarini har tomonlama qo‘llab-quvvatlash maqsadida Transport vaziri o‘rinbosari Ilhomjon Abdugafarov boshchiligidagi ishchi guruh bugun Samarqand shahrida yo‘lovchi tashish bilan shug‘ullanuvchi korxona rahbarlari bilan uchrashdi.

Uchrashuvda O‘zbekiston Respublikasi Prezidentining “Jamoat transporti tizimini isloh qilish chora-tadbirlari to‘g‘risida”gi PQ–59-son qarorida belgilangan vazifalar ijrosini ta’minlash maqsadida olib borilayotgan ishlar tashuvchilar ishtirokida muhokama etildi. Bugungi kunda viloyatda yettita yo‘nalishda brutto-shartnoma tizimi joriy etilganligi va qolgan yo‘nalishlarni ham bosqichma-bosqich tizimga o‘tkazish dolzarbligi ta’kidlandi. Shuningdek, avtomatlashtirilgan to‘lov tizimi qamrovini yanada oshirish bo‘yicha tegishli taklif va tavsiyalar berildi.

Shuningdek, “Yo‘lovchi tashishni monitoring va nazorat qilish” davlat muassasasi va Markazlashgan dispetcherlik xizmati bilan bog‘liq jihatlar ko‘rib chiqildi, yuzaga kelayotgan kamchiliklarni bartaraf etish yuzasidan tegishli tavsiyalar berildi.