Maqsadimiz jamoat transportining nufuzini oshirish

Joriy yilning 17-dekabr holatiga viloyatda 343 ta yo‘lovchi tashish yo‘nalishlari, ya’ni 176 ta avtobus va 167 ta yo‘nalishli taksi yo‘nalishlari (154 tasi Damas yo‘nalishlari) mavjud. Shundan 225 ta yo‘nalishda 664 ta (139 tasi buyurtma asosida) avtobus va 2372 ta Damas va 239 tasi (87 tasi buyurtma asosida) mikroavtobuslar aholiga xizmat ko‘rsatib kelmoqda. 118 ta yo‘nalish faoliyati vaqtincha to‘xtab qolgan. Buning sababi ushbu yo‘nalishlar past rentabelli yo‘nalish hisoblanib, harakatdagi transport vositalari o‘z sarf-xarajatlarini qoplamaganligi sababli tadbirkorlar tomonidan to‘xtatilgan.

Shahar atrofida 249 ta yo‘nalish mavjud bo‘lib, 87 avtobus yo‘nalishi va 62 ta yo‘nalishli taksi yo‘nalishlari belgilangan. Hozirda 76 ta yo‘nalish faoliyati to‘xtab qolgan.

Viloyat hududidagi shaharlararo 24 ta yo‘nalish mavjud bo‘lib, 21 tasi avtobus hamda 3 tasi yo‘nalishli taksi yo‘nalishlaridir. Shundan 5 ta avtobus yo‘nalishi vaqtincha faoliyat yuritmayapti.

Samarqand shahrida 34 ta avtobus yo‘nalishida 300 ga yaqin avtobus yo‘lovchilarga xizmat ko‘rsatmoqda.

Xabaringiz bor, Samarqand shahri transport infratuzilmasini 2030-yilgacha rivojlantirish master-rejasi ishlab chiqilgan. Samarqand shahrida jamoat transportini hamda transport infratuzilmasini rivojlantirish rejasi hamda “Manzilli dasturi” Xalq deputatlari Samarqand viloyati Kengashi tomonidan 2023-yil 13-mart sanasida 6-chaqiriq, 82-sessiyasida ko‘rib chiqilib ma’qullangan. Shuningdek, mazkur reja doirasida amalga oshirilayotgan ishlar doimiy ravishda Ommaviy axborot vositalari hamda jurnalist va blogerlar bilan muhokama qilib kelinmoqda.

Ushbu “Manzilli Dastur”ni amaldagi dasturlar bilan bog‘lagan holda bosqichma-bosqich amalga oshirish yuzasidan tegishli vazifalar belgilab olinib qo‘yidagilar amalga oshirildi:

- shaharning asosiy yo‘lovchi hosil qiluvchi obyektlari va shahar miqyosida yo‘lovchilar oqimidan kelib chiqib, jami 43 ta, (10 ta magistral va 33 ta yetkazib beruvchi) yangi yo‘nalishlar shakllantirilib, shundan 15 tasi - M1, M2, M3, M4, M5, M12, 15, 22, 30, 31, 52, 66, 70, 74, 256-sonli yo‘nalish qatnovlari yo‘lga qo‘yildi.

- 2023-2024-yillarda tashuvchilar tomonidan Xitoy Xalq Respublikasida ishlab chiqarilgan 75 dona “King-Long”, 20 dona “Aziya-Star”, 23 dona “SRRC”, 10 dona “Zong Tong Bus” rusumli avtobuslar, 71 dona “Yutong” rusumli elektrobuslar va 22 dona zamonaviy mikroavtobuslar keltirildi. Shundan 184 ta avtobus shahar jamoat transporti yo‘nalishlariga va 22 tasi shahar atrofi yo‘nalishlariga joylashtirildi.

Manzilli dasturi doirasida jamoat transporti erkin harakatlanadigan alohida avtobus yo‘laklari tizimini joriy etish yuzasidan, Bo‘stonsaroy, Ibn Sino ko‘chalarida va Universitet xiyoboni bo‘ylab jamoat transportining erkin harakatlanishi uchun alohida yo‘lak tashkil etilib, “A” belgisi hamda yo‘l yotiq chiziqlari chizildi.

Hozirda shahar jamoat transportini onlayn nazorat qilish tizimi joriy etilib mutaxassislar tomonidan kuzatib borilib hamda joyiga chiqib shahar jamoat transportini belgilangan yo‘nalishlar bo‘yicha harakatlarini va xizmat ko‘rsatish sifat mezonlarini nazorat qilib borilmoqda.

Shuningdek, Samarqand shahri jamoat transporti tizimidagi barcha avtobus, elektrobus va tramvaylarga avtomatlashtirilgan to‘lov tizimiga (ATTO)ga o‘tkazildi. Bunda jamoat transportidan foydalanishda yo‘lovchilar uchun qulay tariflarni joriy etish hamda elektron to‘lovlarni ommalashtirish maqsadida bir soat ichida bir yo‘nalishli yo‘lovchi transportidan boshqasiga o‘tish sonidan kelib chiqqan holda va ijtimoiy kartalardan (o‘quvchilar, talabalar va nafaqadagilar uchun) imtiyozli tariflar qo‘llanilib kelinmoqda.

Viloyat hududidagi qishloq aholisining transportga bo‘lgan ehtiyojlaridan kelib chiqib o‘rganishlar, tahlillari asosida 2024-yilda tuman qishloqlarini markaz bilan bog‘lovchi va tuman markazlarini qo‘shni tumanlari bilan bog‘lovchi “Mani qishlog‘i-Chelak shahri-Payariq ABB”, “G‘allakor mahallasi-Payariq ABB”, “Mirbozor ABB-Do‘stlik MFY-Mirbozor ABB (aylanma), “Juma ABB-Charxin qo‘rg‘oni-Gulobod Eko Agrologistika bozori”, “Esaboy mahallasi (43-maktab)-Juma ABB”, “Ravot qishlog‘i-Siyob ABB”, “Arabxona qishlog‘i-Ishtixon ABB”, “Hazarbobo MFY-Ishtixon ABB”, “Payshanba ABB-Mirbozor ABB-Oqtosh shahri”, “Payshanba ABB-Yangiobod qishlog‘i”, “Gulobod Eko Agrologistika bozori-Respublika ixtisoslashtirilgan Dermatovenerologiya va kosmetologiya ilmiy-amaliy tibbiyot markazining Samarqand viloyati hududiy filiali”, “Loyish shaharchasi-Yangiravot-1 mahallasi, “Loyish shaharchasi-Yangiqishloq mahallasi” va “Loyish shaharchasi-Miyonqol mahallasi” jami: 10 ta yangi jamoat transporti yo‘nalishlari tashkil qilindi.

Viloyatning shahar, shahar atrofi va shaharlararo viloyat-ichki hududlari bo‘yicha bo‘yicha 343 ta jamoat transporti yo‘nalishlari mavjud bo‘lib shundan 2024-yilda 27 marta elektron ochiq tenderlar o‘tkazildi. Bunda 602 ta lotlar joylashtirilib, 96 ta tender shartnomalari tuzildi.

Avtovokzal va avtostansiyalarning infrastrukturasi bo‘yicha Samarqand shahrida “Ipak yo‘li” avtostansiyasi rekonstruksiya qilindi. Payariq tumanida joylashgan “Payariq” avtostansiyasida kapital ta’mirlash ishlari olib borilmoqda va yil yakuniga qadar foydalanishga topshirilishi rejalashtirilgan. Bundan tashqari, Samarqand shahri, Cho‘pon ota qo‘rg‘onida yangi zamonaviy Avtovokzal qurilishining yakuniga yetish arafasida.  

Viloyatimizning shahar va tumanlarida jamoat transporti uchun oraliq bekatlarni qurish va rekonstruksiya qilinishi borasida joriy yilda Payariq va Toyloq tumanlarida yangi bekatlar qurilib, eskilari rekonstruksiya qilindi. Shaharning bir nechta ko‘chalarida yo‘l modernizatsiya ishlari olib borilishi jarayonida Amir Temur ko‘chasidan boshlab yangi qulay zamonaviy oraliq bekatlari qurilib kelinmoqda, shaharning ko‘chalari va Qorasuv massivida 11 ta bekat pavilonlari o‘rnatilib, 8 ta bekat pavilonlari kapital ta’mirlandi.

Shuningdek, Samarqand shahrida jamoat transportini rivojlantirish hamda tirbandlikni oldini olish maqsadida chekka hududlardan kirib keluvchi transport vositalari harakatini kamaytirish maqsadida jami 2 ta avtostansiya qurilishi rejalashtirilgan. Bugungi kunda Samarqand tumanidan o‘tuvchi M-37 avtomobil yo‘lining Motrid aylanma harakati hududida 1 avtostansiya qurilishi boshlangan va Samarqand tumani “Chumchuqli” MFY M-39 avtomobil yo‘lining aylanmasi hududida 1 ta avtostansiya qurilishi uchun yer maydoni belgilangan bo‘lib, Ye-Auksion tizimiga joylashtirilishi uchun tegishli tashkilotlar bilan kelishish jarayonida.