Matbuot uyida jurnalist va blogerlar uchun matbuot anjumani tashkil etildi

Samarqand viloyatida aholiga transport xizmatini ko‘rsatishda amalga oshirilayotgan ishlar yuzasidan viloyat Matbuot uyida jurnalist va blogerlar uchun matbuot anjumani tashkil etildi. Unda Boshqarma boshlig‘i R.Tojiyev sohada amalga oshirilayotgan ishlar yuzasidan batafsil ma’lumot berdi.

Jumladan, avtobuslarda aholiga transport xizmatini ko‘rsatish borasida 32 ta yuridik shaxs 414 ta transport vositasi bilan yo‘nalishlarda yo‘lovchilarning xizmatida. Ushbu raqamlarni tahlil qiladigan bo‘lsak, viloyat miqyosida avtobusda yo‘lovchi tashish uchun Samarqand shahrida ro‘yxatdan o‘tgan 351 ta avtobus mavjud bo‘lib, shundan 221 tasi shahar avtobus yo‘nalishlarida aholiga xizmat ko‘rsatmoqda. Biroq, bu ko‘rsatkich Samarqand shahri uchun umumiy talab qilinadigan avtobuslarning 44.2 foizi, xolos. Holatni tumanlar kesimida olib qaraydigan bo‘lsak, Nurobod, Oqdaryo, Toyloq tumanlarida ro‘yxatdan o‘tgan birorta avtobus mavjud emas.

Yo‘nalishli taksi yo‘nalishlariga e’tibor qaratadigan bo‘lsak, bugungi kunda 81 ta litsenziat 2 207 ta transport vositalari bilan aholi xizmatida. Ushbu transport vositalaridan 124 tasi mikroavtobus bo‘lsa, qolgan 2 083 tasi Damas rusumli transport vositalaridir.

Bundan tashqari, turizm sohasi va ishlab chiqarish korxonalarida 55 ta litsenziatda 142 ta avtobus va 86 ta mikroavtobus mavjud.

Shuningdek, viloyat miqyosida 118 ta yo‘nalishsiz taksi xizmatini ko‘rsatuvchi korxona mavjud bo‘lib, ular 840 ta transport vositalari bilan aholiga pullik asosda xizmat ko‘rsatmoqda. Samarqand viloyatida 18 504 nafar fuqaro o‘ziga tegishli bo‘lgan to‘rt o‘rindiqli 18 681 ta yengil avtotransport vositalarida yo‘lovchi tashish sohasida o‘zini o‘zi band qilib, litsenziya olgan.

Tumanlarda aholini jamoat transportiga bo‘lgan ehtiyojini qondirish maqsadida bir qancha yangi yo‘nalishlar tashkil etildi. Jumladan, 346-raqamli “Mirbozor ABB – Do‘stlik mahallasi – Mirbozor ABB”  shahar atrofi avtobus yo‘nalishi, 323-sonli “Juma ABB-Charxin qo‘rg‘oni-Gulobod Eko Agrologistika bozori”, 454-raqamli  “Mani qishlog‘i – Xo‘ja Ismoil mahallasi – Chelak shahri – Payariq ABB”, 455-raqamli  “G‘allakor mahallasi – Payariq ABB” hamda 464-sonli “Esaboy mahallasi (43-maktab)-Juma ABB” yo‘nalishli taksi yo‘nalishlari  tashkil etilib, yo‘lovchilarga xizmat ko‘rsatmoqda.

So‘nggi yillarda Samarqand shahar aholisiga hamda shahrimiz mehmonlariga avtotransport xizmati ko‘rsatishni yaxshilash, jamoat transporti yo‘nalishlari tarmog‘ini kengaytirish va harakat tarkibini zamonaviy, ekologik toza avtobuslar bilan yangilash bo‘yicha keng ko‘lamli ishlar amalga oshirildi.

O‘zbekiston Respublikasi Prezidentining «Jamoat transporti tizimini isloh qilish chora-tadbirlari to‘g‘risida»gi 2023-yil 16-fevraldagi PQ-59-son qarorida  Samarqand shahrida muntazam shahar avtobus yo‘nalishida cheklangan tariflar bo‘yicha yo‘lovchilar tashishni brutto-shartnoma asosida tashkil etish va moliyalashtirish tizimining bosqichma-bosqich ishga tushirilishi ko‘rsatib o‘tilgan.

Qaror ijrosini ta’minlash maqsadida Samarqand shahar avtobus yo‘nalishlari tender tanlovlariga chiqarilib, https://e-tender.uztrans.uz/ elektron manzili orqali o‘tkazilgan tender natijalariga ko‘ra, 7 yo‘nalishda “Marokand trans 777” MCHJ g‘olib deb topildi va brutto-shartnomalari tuzildi.

Shahar avtobus yo‘nalishlarini monitoring va nazorat qilish uchun tashkil etilgan  “Samarqand yo‘lovchi tashishni monitoring va nazorat qilish” Davlat muassasasi “UzBusMonitoring” (IVMS) axborot tizimi kuzatuv ishlari olib borilmoqda. Ushbu Davlat muassasasida 3 ta nozim, 1 ta nazoratchi, 1 ta tashuvlarni muvofiqlashtirish bo‘yicha Bosh mutaxassis doimiy ravishda tashuvlarni nazorat qilib bormoqda.

Avtomobil yo‘llarida kuzatilayotgan tirbandliklarni hisobga olgan holda jamoat transportiga ustunlik berish maqsadida Samarqand shahrining Abu Ali ibn Sino, Bo‘stonsaroy nomli ko‘chalarida hamda Universitet xiyobonida avtobuslar uchun alohida tasma tashkil qilindi. Shuningdek, yaqin kunlarda Gagarin nomli ko‘chada hamda xuddi shunday avtobuslar uchun alohida tasma tashkil qilish rejalashtirilgan.

Jamoat transporti harakatini to‘g‘ri va samarador tashkil etilishida avtostansiya va bekatlarning o‘rni beqiyos. Samarqand viloyati bo‘yicha jami 17 ta avtostansiya hamda 1422 ta avtobus oraliq bekatlari mavjud.

Avtostansiyalar tadbirkorlik subyektlariga tegishli bo‘lsa, 1033 ta bekat Avtomobil yo‘llari boshqarmasi  balansida hamda 389 tasi tadbirkorlik subyektlariga tegishli.

Me’yoriy-texnik standartlarga asosan avtobus oraliq bekatlari yo‘lovchilarni tushirish-chiqarish maydonchasi, avtobuslar kirish va to‘xtash qismi, piyodalar kirish va chiqish qismi, yo‘l belgisi, ayvon, o‘rindiqlar, nogironlar uchun chiqish-tushish yo‘lakchasi (pandus), chiqindi qutisi va axborot ko‘rsatkichlari  kabi elementlar bilan jihozlanishi belgilangan bo‘lsa-da, o‘rganishlar davomida aksariyat bekatlarda yuqoridagi talablarning deyarli birortasi bajarilmaganligi aniqlandi.

Avtostansiyalarning joriy holati yuzasidan viloyat transport boshqarmasi tomonidan o‘rganish ishlari olib borildi. O‘rganish davomida bir qator kamchiliklar aniqlandi. Misol uchun, Ishtixon tumanidagi “Avtoservis Ishtixon” MCHJga qarashli “Ishtixon”, “Suxrob avto trans” MCHJga qarashli “Mitan” avtostansiyalari tomonidan tanqidlarga qaramasdan hech qanday ishlar qilinmagan,  Paxtachi  tumanidagi “Paxtachi Tashkiliy Avto”  MCHJga qarashli “Ziyoddin”  avtostansiyasida esa jamoat transportiga chiqish perronlari me’yoriy-standartlarga javob bermaydi hamda jamoat transporti kirib-chiqishi uchun yo‘laklar ta’mirtalabligicha qolgan.

Narpay tumanidagi “Samarqand Ideal Servis” MCHJga qarashli “Mirbozor” avtostansiyasi hududi esa chiqindilardan ham tozalanmagan, nogironligi bo‘lgan shaxslar uchun sharoitlar yaratilmagan, hududga kirish va chiqishda xavfsizlik choralari ko‘rilmagan.

Payariq  tumanidagi “Ottava KAN”  MCHJga qarashli “Payariq”  avtostansiyasi O‘zbekiston Respublikasi Prezidentining 2022-yil 12-iyuldagi PQ-316-sonli “2022-2026-yillar davomida amalga oshirilishi mo‘ljallangan “Xavfsiz va ravon yo‘l” umummilliy dasturini tasdiqlash to‘g‘risida”gi qaroriga asosan rekonstruksiya qilish rejalashtirilgan bo‘lsa-da, ushbu vazifa amalga oshirilmasdan qolgan.

Joriy yilning avgust oyida aniqlangan kamchiliklar yuzasidan viloyat hokimligida bo‘lib o‘tgan tanqidiy yig‘ilishdan so‘ng barcha avtostansiyalarda ta’mirlash va rekonstruksiya ishlari olib borilmoqda. Viloyat hokimi tomonidan avtostansiyalar va bekatlarni tartibga keltirish yuzasidan berilgan topshiriqlar ijrosi qayta o‘rganib chiqiladi.

 

O‘zbekiston Respublikasi Vazirlar Mahkamasining 2022-yil 28-apreldagi “2022 — 2026-yillarda Samarqand viloyati hududlarini kompleks ijtimoiy-iqtisodiy rivojlantirish va aholi turmush darajasini yanada yaxshilashga doir qo‘shimcha chora-tadbirlar to‘g‘risida” 222-sonli qarorida Oqdaryo tumanida 1 ta avtostansiya qurilishi belgilangan bo‘lib, hozirga qadar qurilish ishlari boshlanmagan. Natijada yo‘lovchi tashish transportlari tumandagi dehqon bozori hududidagi avtomobil yo‘lida to‘xtashga majbur bo‘lmoqda. Buning natijasida hududda tartibsizlik va tirbandliklar kuzatilmoqda. Bu esa o‘z navbatida keng jamoatchilik e’tiroziga sabab bo‘lib qolmoqda.