Sohada yo‘lovchilarning o‘rni muhim!

Samarqand viloyati transport boshqarmasida jamoat transporti bilan bog‘liq muammolarga barham berish, avtobuslarning harakat muntazamligini ta’minlash, eng asosiysi, yo‘lovchilarga sifatli xizmat ko‘rsatishni tashkil qilish maqsadida avtotransport sohasida faoliyat yuritayotgan tadbirkorlik subyektlari rahbarlari ishtirokida yig‘ilish bo‘lib o‘tdi.

Tanqidiy ruhda o‘tgan uchrashuvda tomonlar yo‘lovchi tashish sohasida yo‘l qo‘yilayotgan kamchiliklar va ularning yechimiga e’tibor qaratildi. Avtokorxona rahbarlaridan o‘z ishiga mas’uliyat bilan yondashishi, har bir haydovchi bilan alohida suhbat olib borilishi lozimligi aytib o‘tildi. Boshqarma boshlig‘i R.Tojiyev sohada faoliyat yuritayotgan tadbirkorlik subyektining asosiy daromad manbai yo‘lovchilar bilan bog‘liqligi, sohada yo‘lovchilarning o‘rni muhimligi, shuning uchun ular bilan samimiy munosabatda bo‘lish avtokorxona rahbariyati va haydovchilarning birinchi navbatdagi vazifasi ekanligi misollar tariqasida asoslab berdi.

Yig‘ilishda ko‘rilgan masalalarga yechim topish va jamoat transportida xizmat sifatini oshirish bo‘yicha mas’ullarga topshiriq va ko‘rsatmalar berildi.