Yana 15 ta elektr avtobus Samarqandda

Samarqand shahar jamoat transportini rivojlantirish borasida elektrobuslar olib kelinayotganligi haqida xabar berib kelmoqdamiz. Bugungi kunga qadar 36 ta elektrobus olib kelinib, yo‘lovchilar xizmatiga chiqarildi. Ushbu elektrobuslar M1-sonli “Temiryo‘l vokzali-Samarqand xalqaro aeroporti”, M2-sonli “Vatanparvar mahallasi-Samarqand tuman shifoxonasi”, M4-sonli “Temiryo‘l ABB-Siyob ABB” va M5-sonli “Temiryo‘l ABB-Temiryo‘l ABB (halqa yo‘nalish)” shahar avtobus yo‘nalishlarida aholiga transport xizmatini ko‘rsatib kelmoqda.

Bugun Samarqand shahriga yana 15 ta elektrobus quvvatlash qurilmalari bilan olib kelindi. Yil yakuniga qadar elektrobuslarning umumiy sonini 100 taga yetkazish rejalashtirilgan.

Rasmiylashtirish ishlari yakuni bilan ushbu elektrobuslar ham belgilangan tartibda Samarqand shahar jamoat transporti yo‘nalishlariga aholi xizmatiga chiqariladi.