Yangi olib kelingan elektrobuslar eski yo‘nalishlarga chiqarilmadi

#Munosabat

 Keyingi kunlarda ijtimoiy tarmoqlarda, jumladan, Fecebook tarmog‘ida Samarqand shahar jamoat transportiga oid murojaat tarqaldi. Unda yangi olib kelingan elektrobuslar eski yo‘nalishlarga chiqarilmadi, mazmunida savol qoldirilgan. Murojaat muallifi “Anonim ishtirokchi”.

 Samarqand viloyati transport boshqarmasi ushbu murojaat yuzasidan quyidagilarni ma’lum qiladi:

 Xabaringiz bor, Samarqand shahrida bir birini takrorlovchi yo‘nalishlar ko‘pligi sababli bir qancha ko‘ngilsiz holatlar keltirib chiqargan edi. Avtobuslarda kimo‘zarga quvishish, yo‘lovchi talashish va boshqalar.

 Yuqoridagi kabi noxush holatlarga barham berish maqsadida O‘zbekiston Respublikasi Transport vazirligi, Samarqand viloyati hokimligi va “Simetra” xorijiy korxonasi hamda aloqador tashkilotlar hamkorligida Samarqand shahar transport tizimining jozibadorligini oshirish uchun Bosh reja ishlab chiqildi. Mazkur Bosh rejani ishlab chiqish uchun har bir mahallada, har bir ko‘chada tasvirga olish uskunalari yordamida, shuningdek, bevosita aholi o‘rtasida so‘rovnoma o‘tkazish orqali yo‘lovchi va avtomobil oqimi o‘rganildi.

 Natijada avvaldan mavjud yo‘nalishlar yaxlit holatga keltirilib, 10ta asosiy va 33ta yetkazib beruvchi yo‘nalishlardan iborat jamoat transporti tarmog‘i shakllantirildi. Mazkur yo‘nalishlar asosida tashuvlarni tashkil etish yo‘lga qo‘yildi.

 Hozirda tadbirkorlik subyektlari bilan hamkorlikda yangi avtobuslar xarid qilish va uni ushbu yo‘nalishlarga joylashtirish bo‘yicha amaliy ishlar olib borilmoqda.

 O‘zbekiston Respublikasi Prezidentining 2023-yil 16-fevraldagi “Jamoat transporti tizimini isloh qilish chora-tadbirlari to‘g‘risida” qaroriga asosan jamoat transportida xizmat sifatini oshirish maqsadida olib kelinayotgan yangi avtobus va elektrobuslar tender tanlovlari asosida yangi yo‘nalishlar tarmog‘idan o‘rin olgan yo‘nalishlarga joylashtirilmoqda.

 Xuddi shuningdek, avtobuslardan almashib foydalanishda aholiga qulayliklar yaratish maqsadida egiluvchan tariflar tizimi joriy etildi. Bugungi kunda ATTO transport kartalari orqali yo‘lkira haqini to‘lash 1 600 (bir ming olti yuz) so‘m, bir soat davomida foydalanish esa birinchi avtobusda 1 600 so‘m, ikkinchisida 400 so‘m, uchunchi va to‘rtinchi sayohatlar bepul amalga oshiriladi.

Xulosa o‘rnida aytadigan bo‘lsak, Samarqandda jamoat transportida xizmat ko‘rsatish sifati yangi bosqichga ko‘tarilmoqda.