Yo‘nalish tenderga chiqarilgan

#Munosabat

Ijtimoiy tarmoqlarda, jumladan, “Shokirjonov news”, “Samarkand & Самаркандцы” telegram kanallarida Samarqand viloyati transport boshqarmasi manziliga murojaatlar e’lon qilindi.

Samarqand viloyati transport boshqarmasi, avvalo, jamoatchilik nazorati uchun barchaga minnatdorlik bildiradi hamda mazkur holatlar bo‘yicha quyidagilarni ma’lum qiladi:

340-sonli “Go‘zalkent qo‘rg‘oni-Hazora ABB” shahar atrofi yo‘nalishida haqiqatan ham “Zoxidjon”MCHJga tegishli transport vositalari aholiga xizmat qilib kelgan. Biroq, «Zoxidjon» MCHJ ta’sischisi Dangalov G‘iyos Muratovich murojaatida aks etganidek sifatli darajada emas, korxona tomonidan tender talab va shartlari doimiy ravishda buzib kelingan.

Aholi tomonidan tushgan e’tirozlar yuzasidan boshqarma hamda O‘zbekiston Respublikasi Transport vazirligi huzuridagi Transport nazorati inspeksiyasi Samarqand viloyati hududiy bo‘limi tomonidan o‘tkazilgan o‘rganishlar natijasida berilgan ogohlantirishlarga qaramasdan «Zoxidjon» MCHJ tender talab va shartlariga rioya qilmagan. Buning natijasida 340-sonli “Go‘zalkent qo‘rg‘oni-Hazora ABB” shahar atrofi yo‘nalishida «Zoxidjon» MCHJ bilan tuzilgan tender shartnomasi sud organlari tomonidan bekor qilingan. Bugungi kunda yo‘nalish tender tanlovlariga qo‘yilgan.

31-sonli “Aziz” kafe-Samarqand tumani shifoxonasi” shahar avtobus yo‘nalishida xizmat ko‘rsatuvchi transport vositalari harakati yuzasidan “Yo‘lovchi tashishni monitoring va nazorat qilish” davlat muassasasi xodimlari tomonidan nazorat o‘rnatilgan. Mazkur yo‘nalishda xizmat ko‘rsatuvchi korxona rahbariyati tomonidan jamoat transporti haydovchilariga qo‘yilgan talablar yuzasidan qayta yo‘riqnoma o‘tkazildi.