Yo‘nalishlar nega qisqartirildi? M3 bilan 77-sonli yo‘nalishlar bir-birini takrorlaydimi?

#Munosabat

Joriy yilning 23-yanvar sanasida hamda bugun, 24-yanvarda ijtimoiy tarmoqlar orqali Samarqand viloyati transport boshqarmasi nomiga bir qator anonim taklif va e’tirozlar bildirildi. Ushbu murojaatlar yuzasidan Samarqand viloyati transport boshqarmasi quyidagilarni ma’lum qiladi:

 

30-sonli yo‘nalish yuzasidan:

Murojaatchi tomonidan berilgan taklif joyiga chiqqan holda o‘rganiladi. Bunda avtomobil yo‘lining joriy holati e’tiborga olinadi.

 

45-sonli yo‘nalishni tiklash yuzasidan

Bugungi kunda aynan 45-sonli yo‘nalishni tiklash imkonsiz. Ushbu hududda yashovchi aholini jamoat transporti bilan ta’minlash maqsadida 87-sonli “Sartepa maskani-Universitet xiyoboni” shahar avtobus yo‘nalishini tashkillashtirish rejalashtirilgan.

 

M3 bilan 77-sonli yo‘nalishlar bir-birini takrorlaydimi?

Samarqand shahar, “Do‘stlik” mahallasi aholisini jamoat transporti bilan ta’minlash maqsadida ushbu yo‘nalishlardagi transport vositalari aholi xizmatiga chiqarilgan. Albatta, bunda ushbu hududdagi yo‘lovchi oqimi e’tiborga olingan. Hozirda mazkur yo‘nalishlardan birini qisqartirish hududda avtobus yetishmovchiligini keltirib chiqaradi. Shuningdek, mazkur yo‘nalishlar O‘zbekiston Respublikasi Vazirlar Mahkamasining 2003-yil 4-noyabrdagi “O‘zbekiston Respublikasida avtomobil transportida yo‘lovchilar va bagaj tashish qoidalarini hamda avtobuslarda yo‘lovchilar tashish xavfsizligini ta’minlashga doir talablarni tasdiqlash haqida” 482-sonli qarorida belgilangan talablar asosida boshqa yo‘nalishdagi transport vositalari bilan takrorlanish darajasi past darajada. Samarqand shahridagi “Mahmud Qoshg‘ariy”, “Orzu Mahmudov”, “Mahmud Qoshg‘ariy”, “Lutfiy” ko‘chalari “Amir Temur” (237 metr) (M2, M4, 74-sonli), “Firdavsiy” (238 metr) (60-sonli), “O‘zbekiston” (251 metr) (M3-sonli) ko‘chalari oralig‘ida joylashgan va ushbu transport vositalari qatnovi mavjud.

Haqiqatan ham 37-sonli yo‘nalishda Isuzu rusumli transport vositalari aholiga xizmat ko‘rsatmoqda. Ushbu yo‘nalishdagi transport vositalari ham navbati bilan yangi avtobuslarga almashtirilishi rejalashtirilgan.

 Qisqartirilgan yo‘nalishlar yuzasidan

Samarqand shahar avtobus yo‘nalishlarida harakatlanuvchi transport vositalari bosqichma-bosqich O‘zbekiston Respublikasi Prezidentining 2023-yil 16-fevraldagi “Jamoat transporti tizimini isloh qilish chora-tadbirlari to‘g‘risida” qarori asosida Brutto-shartnoma tizimiga o‘tkazib borilmoqda. Bunda jamoat transportida xizmat sifatini oshirish maqsad qilingan.

Joriy yilning 24-yanvar holatiga qadar 18 ta yo‘nalishda tender tanlovlari asosida Brutto-shartnomasi imzolangan.

Biroq, 31-sonli ““Aziz kafesi”-Sil kasalliklari shifoxonasi”, 74-sonli “Sartepa maskani-Chumchuqli mahallasi”, M2-sonli “Vatanparvar mahallasi-Gulobod qo‘rg‘oni” hamda M4-sonli “Parrandachilik fabrikasi-Temiryo‘l ABB” shahar avtobus yo‘nalishlari O‘zbekiston Respublikasi Vazirlar Mahkamasining 2003-yil 4-noyabrdagi “O‘zbekiston Respublikasida avtomobil transportida yo‘lovchilar va bagaj tashish qoidalarini hamda avtobuslarda yo‘lovchilar tashish xavfsizligini ta’minlashga doir talablarni tasdiqlash haqida” 482-sonli qarori talablariga asosan shahar chegarasida qisqartirildi.

Qaror bilan yo‘lovchilarni tashish quyidagi turlarga bo‘lingan:

a)shaharda tashish,

1. b) shahar atrofida tashish;
2. v) shaharlararo tashish;
3. g) xalqaro tashish.

Shuningdek, shahar jamoat transportiga tarif berilar ekan, shahar chetidan ko‘pi bilan 2 km chetga chiquvchi shaharda qatnovchi yo‘nalishlar, deb ko‘rsatib o‘tilgan.

Qisqartirilgan shahar avtobus yo‘nalishlari o‘rnida shahar atrofi yo‘nalishlari tashkil etib borilmoqda. Shuningdek, shahar atrofi yo‘nalishlarida xizmat ko‘rsatuvchi korxonalarga zamonaviy talablar asosida jihozlangan avtobus yoki mikroavtobuslar xarid qilish va aholi xizmatiga chiqarish taklifi berilgan.