Jamoat transportida turli xil ko‘ngilsiz holatlarning oldini olish, uni xavfsiz xizmat ko‘rsatish tizimiga aylantirish, kissavurlik jinoyatlarining oldini olish dolzarb masalaga aylanib bormoqda.

Yuqoridagi kabi holatlarning oldini olish masalalari yuzasidan O‘zbekiston Respublikasi Prezidentining 2025-yil 3-yanvardagi “2025-yilda respublika mahallalarida xavfsiz muhitni yaratish va huquqbuzarliklarning barvaqt oldini olish tizimi samaradorligini yanada oshirish bo‘yicha chora-tadbirlar to‘g‘risida” PQ-1 sonli qarorida aniq vazifalar belgilab berildi.

Ushbu qaror ijrosini ta’minlash, jamoat transportida sodir etilishi ehtimoli mavjud bo‘lgan jinoyatlarning oldini olish maqsadida Samarqand viloyati transport boshqarmasida yo‘lovchi tashish faoliyati bilan shug‘ullanuvchi korxona-tashkilotlar rahbarlari ishtirokida kengaytirilgan yig‘ilish bo‘lib o‘tdi. Unda tashuvchi korxonalar rahbarlariga avtobus salonlaridagi kuzatuv kameralarining doimiy ishlashini ta’minlash, favqulodda holatlar uchun tezkor xabardor qilish tugmasini (SOS) o‘rnatish vazifasi yuklatildi. Yig‘ilishda Transport nazorati inspeksiyasi boshlig‘i o‘rinbosari S.Turg‘unov, boshqarma boshlig‘i R.Tojiyev hamda viloyat IIB JXX YHXB boshlig‘i o‘rinbosari podpolkovnik A.Turayev ishtirok etib, jamoat transportida xavfsiz muhitni yaratish borasida mas’ullarga tegishli ko‘rsatma va tavsiyalar berdi.